Junne Cañizares

Si Potenciano "Junne" Cañizares, Jr., (nailhan usab sa dagangalang Xon Khan Zares) usa ka magsusulat sa pinulongang Binisayang Sinugboanon.

Personal nga impormasyon

Si Cañizares natawo sa Dumlog, Dakbayan sa Talisay, Sugbo. Usa siya ka manlalaban ug retiradong arbiter sa pamuo. Sa kabatan-on, editor siya kanhi sa usa ka mantalaang pangkampus; nahimong sakop sa kapangulohan sa Bisaya Magasin sa mga tuig 1960-1965 ubos ni Editor Francisco Candia ug usa sa maunongong dumadapig sa maong magasin.

Si Cañizares labing nahigugma sa Binisaya apan tigsulatan usab og Iningles. Ang iyang mga sinulat sa maong pinulongan nangapatik sa Philippine Free Press, Philippine Graphic, Sunday Inquirer, ubp. Ang libro niyang The Fastest Ulisi Fighter nga didto gipatik sa Canada nahimong himalitan. Ang iyang mga lindog sa Bisaya Magasin sama sa "Pananaw: Sa Kinaadman, Kultura, ug Kinabuhi" ug "Unsay Arang Mahimo" usa sa labing impluwensiyal nga seryal nga nasulat sa Binisayang Sinugboanon tungod sa kahupong niini sa kinaadman.

Nakasulat na si Cañizares og kapid-an ka mga balak, sugilanon, ug mga nobela nga nahiluwan sa nagkalainlaing antolohiya ug mga magasin. Ang dula niyang "Raha Hamabar" apil sa gihubad nga dula nga nalangkob sa librong Panulaang Cebuano nga gipatik sa Ateneo University Press.

Mga sinulat nga nobela

• Cara A Cara (Bisaya Magasin)
• Ang Damgo ni Ezra (Bisaya)
• Mga Salampating Langyaw sa Las Vegas (Bisaya)
• Manila Mon Amor (Bisaya)